তাৰিখ: ১৪/০২/২০২৬
ঠিকনা: গুৱাহাটী, মৰাণ (অসম)
প্ৰধানমন্ত্ৰী মোদীৰ চীনলৈ কঠোৰ বাৰ্তা; মৰাণ বাইপাছত বায়ুসেনাৰ ‘বাহুবলী’ৰে অৱতৰণ কৰি দেখুৱালে ভাৰতৰ শক্তি। অসমত আজি এক ঐতিহাসিক মুহূৰ্তৰ সাক্ষী হোৱা গ’ল, যেতিয়া প্ৰধানমন্ত্ৰী নৰেন্দ্ৰ মোদীয়ে বায়ুসেনাৰ বাহুবলী বিমান C-130J ৰে ডিব্ৰুগড়ৰ মৰাণ বাইপাছত থকা জৰুৰীকালীন অৱতৰণ সুবিধাৰ (Emergency Landing Facility – ELF) ওপৰত অৱতৰণ কৰে। ইয়াত তেওঁ যুঁজাৰু বিমান, পৰিবহণ বিমান আৰু হেলিকপ্টাৰৰ আকাশী প্ৰদৰ্শনী প্ৰত্যক্ষ কৰিব। উত্তৰ-পূব ভাৰতত এয়া নিজৰ ধৰণৰ প্ৰথমটো অৱতৰণৰ সুবিধা। ভাৰতীয় বায়ুসেনাৰ সৈতে সমন্বয় ৰাখি বিশেষকৈ জৰুৰীকালীন অৱস্থাত সামৰিক আৰু অসামৰিক বিমানৰ অৱতৰণ তথা উৰণৰ বাবে ইয়াক ডিজাইন আৰু নিৰ্মাণ কৰা হৈছে। ই জৰুৰীকালীন সঁহাৰিৰ বাবে এক গুৰুত্বপূৰ্ণ সম্পদ হিচাপে কাম কৰিব, যাৰ ফলত উত্তৰ-পূবত প্ৰাকৃতিক দুৰ্যোগ বা কৌশলগত প্ৰয়োজনীয়তাৰ সময়ত উদ্ধাৰ আৰু সাহায্য অভিযান তৎক্ষণাত মোতায়েন কৰাটো সম্ভৱ হ’ব। দ্বৈত ব্যৱহাৰৰ আন্তঃগাঁথনি হিচাপে বিকশিত এই ELF, ৪০ টন পৰ্যন্ত ওজনৰ যুঁজাৰু বিমান আৰু ৭৪ টন সৰ্বাধিক টেক-অফ ওজনৰ পৰিবহণ বিমান পৰিচালনা কৰিবলৈ সক্ষম।